سلسلة العروس: اساسيات فاليزة ليلة الدخلة
عالم المراة مع نسرينDZ
سلسلة العروس: اساسيات فاليزة ليلة الدخلة
بسم الله الفتاح العليم و الصلاة و السلام على رسوله الكريم اما بعد..............
مقدمة لموضوع اليوم
مرحبا بكم حبوباتي 💕ان شاء الله راكم كامل بالف خير و عافية, اليوم نسلطوالضوء على موضوع مهم جدا👈 للمقبلات على الزواج ,و هو👈 اساسيات فاليزة ليلة العمر او ليلة الدخلة.
كما علابالنا كامل العروسة تدي معاها بزاف فاليزات ,كل وحدة واش تحط فيها, بصح تخلي فاليزة ليلة الدخلة 💑هي اخر حاجة باه ماتنسى فيها والو, بعد ما تستفي كامل جهازك و تعرفي كل فاليزة واش حطيتي فيها, تبداي تجهزي الفاليزة لي تديها معاك, خاصة اذا رحتي مع راجلك للاوتال .
- و من هنا نبدا باستعراض اهم لحوايج لي لازم يكونو داخل حقيبة او فاليزة ليلة الدخلة بالتفصيل:
فاليزة ليلة الدخلة
- اول حاجة انك تختاري فاليزة متوسطة الحجم ,و تكون باهية و جميلة ;ماتنسايش بلي كامل العيون👀 عليك لازم تخيري كلشي بالطبع و الشان 👍
- تحطي فيها السجادة و طقم الصلاة تاعك, و مادابيك تدي سجادة اخرى لراجلك ولا نسا ما جابش معاه وحدة, و تكوني ربحتي اجر عند ربي كل ما يصلي عليها 😍و تزيدي تدي درا في اللون الابيض, تفرشيها علابالك في الاوتال لازم تستخدمي درا تاعك خير احم احم فهم يا الفاهم ههههههه
- الملابس الخاصة بليلة الدخلة
- نرجعو لواش تحطي في الفاليزة تاعك تكوني جهزتي اونصوبل ولا ديزابيي 💕في الشباب و يكون ابيض و تاع ستا الله الله 💃راكي علابالك هذي الليلة ماتتعوضش و ماكانش ليلة كما هي في المستقبل😂 الوغ بروفيتي من اصغر التفصيلات اهتمي بجمالك و اناقتك في كلشي و تديي مع ديزابيي الشبشب لي تلبسيه معاه
- و حطي مع ديزابيي دوبياس يكونو في اللون الابيض
- و طبعا ماتنسايش تدي معاك ملابس داخلية اخرى تبدلي كي دوشي
- و بما انو قلنا دوشي الوغ يلزملك صورتي دوبا يكون خفيف و مايديش بلاصة في الفاليزة
- لوازم الحمام
- زيدي دي معاه سرابت وحدة ليك وحدة لراجلك رايحة تلقاي في الاوتال سرابت بصح تستعملي تاعك خير في رايي😏
- وزيد دي معاك نويزات تكون في اللون الاحمر او لون اخر المهم بدلي اللوك يحبوك كما يقولو هههه تلبسيها غدوا من داك ولا كنت داصرتي ديجا راجلك و تنحاتلك الحشمة تبداي تبدلي و تزوخي ههههه قدامو الوغ لازم تدي معاك حاجات مثيرة و ساكسي💃💖
- تدي لوازم الحمام (شامبو, جال دوش, صابون ,حكاكة ,بينيات, ولا شوش ,تحكمي بيه شعرك مشطة, مرطب الجسم و لا معطر, دونتيفريس و بروس تاعو, و عطر مميز يتفكرك بيه راجلك ههههه كل ما ديريه ,ماشي هادوك تاع عشرين الف ,شري حاجة مليحة و تحكم )😎
- تدي معاك معطر للفم و معطر المنطقة الحساسة يتباع عند الصيدلية
- السيشوار ولا ليسور و المشطة تاعهم
- ماتنسايش تدي معاك كلاكيت ولا شبشب يكون مريح ترتاحي فيه و تدخلي بيه الحمام
- تدي علبة مكياج فيها كامل لي تسحقي باش ديري شوي مكياج; بوخفيف برك
- تدي ثانيك زوج صاشيات صغار وحدة تحطي فيها القش لي ستخدمتيه, في الليلة تاعك ووحدة تحطي فيها اكسسوارات لي تنحيهم من شعرك, ولا لي ترجعيهم للحفافة ,باش مايتبحرولكش في الفاليزة😐
- ملابس الصبوحي للعروسة
- مادابيك تدي شوية شموع لخلق جو رومانسي بينكما😍💑
- ندي اللبسة لي تلبسيها في الصبوحي تاعك كاش قفطان ولا كاش طايور الله الله و تدي معاه الاكسسوارات لي تلبسيهم معاه و التالو
- و تدي خيط و ابرة احتياطا,كاش ما يتمزقلك حاجة من اللبسة تاع الصبوحي ,تخيطيها الاحتياط واجب هههه
- و حاجة مهمة مافيها باس لوكان تكوني شريتي كادو لراجلك و تفاجئيه في ديك الليلة💑
- و اخر حاجة خليتها للاخير باش ماتنسايهاش هي بطاقة الهوية تاعك و تاع راجلك و الدفتر العائلي لازم😳
و اتمنى لكم حياة زوجية سعيدة, و ربي يرزقكم بالذرية الصالحة, ان شاء الله
💋💋💋💋💋💋💋💋💋💋💋💋💋💋💋💋💋💋💋💋
- موضوع مقترح اساسيات فاليزة شهر العسل لقراءة المقالة اضغط هنا 👉
❤❤❤❤
RépondreSupprimer🤩🤩🤩🤩🤩🥰❤
RépondreSupprimer👌👌👌👌👌👌👌👌👌
RépondreSupprimerيعطيك الصحة
RépondreSupprimer👌👌👌👌👌
RépondreSupprimer🤩❤❤🤩❤🥰🥰
RépondreSupprimerيعطيك الصحةة
RépondreSupprimer❤🥰
RépondreSupprimer