افكار هدايا العروسة لاهل العريس و كيفية لتزيينها بشكل راقي و جميل

سلسلة جهاز العروس:افكار هدايا العروس لاهل العريس و كيفية  تزيينها بشكل راقي

                                   عالم المراة مع نسرين DZ

بسم الله الفتاح العليم و الصلاة و السلام على حبيبنا رسول الله الكريم اما بعد........

مرحبا بكم الزينات نتمنى تكونو كامل بالف خير و عافية, اليوم جبتلكم موضوع تكملة لسلسلة جهاز العروس👰, لي تكلمنا عليها في مواضيع سابقة .
و كما علابالنا كامل ان من عاداتنا و تقالدينا الجزائرية💕 ان تقوم العروس باحضار هدايا لعائلة الزوج👵👴👲 حسب القدرة المالية لي تقدر عليها😀 
و كاين لي ماعلابالهومش واش هوما الهدايا لي تقدر تمدهم لاهل العريس👱 خاصة ان كان زواجها هو اول زواج في عائلتها, اي ليس لديها تجربة مثل زواج اختها او اخيها ,و لهذا  ساقدم كل تفاصيل هذا الموضوع, و بعض الافكار التي قد تساعدك على اتخاذ قرارك و اتمنى ان تستفيدي و لو فكرة او اكثر😙 

                        

              هدايا لاهل الزوج 

                     اولا نبداو بكبار العائلة 👵👴عجوزك و شيخك 

                                          هدية  لعجوزتك 👵   

كاين بزاف افكار هدايا تقدري تمديلها مثلا :

1. قماش تاع الحرير يكون نوع لمخير ماشي بومدرح😂و تزيدي لها قرعة بارفا تكون شوية غالية, مادرحيهاش بديودورون تاع عشرين الف ههههه, راني نقصر 😋 لازم تديري كلشي بالطبع باش ياخذو عليك فكرة مليحة يالوكان بجاست صغير. 
2. تقدري تمديلها روب مخيطة الله الله على حساب تقاليدكم, واش ليروب لي تخيطوهم للنسا الكبار. 
3. تقدري تمديلها ثانيك une couverture ولا كووات تكون في ستيل شباب .
4. كما تقدري تمديلها حاجة سامبل ولا ماعندكش دراهم مثل سربيتة مليحة و قرعة ريحة و صابونة .
5. ولا مديلها سجادة و مصحف او شريلها طقم صلاة شباب راهم رخاص.

                                        هدية لشيخك 👴 

ماعندكش بروبلام كبير في اختيار الهدايا هو ساهل تقدري تهديلو اما :

1.   سجادة ومصحف .
2. او قرعة ريحة و جال دوش و صابونة دوف.
3. او قميص الصلاة لي يروح بيه للجامع.

                       هدايا لاخوات الزوج (لواساتك)👧👩

ماتخميش بزاف في الهدايا لي تمديهم للوساتك خاصة ولا كانو بزاف يعني راجلك عندو بزاف اخوات و انت ماراكيش اوبليجي تمديلهم حاجة توب يا درا يكفوك دراهمك ديري بيه جهازك بصح مالقري كلشي لازم ديلريلهم يالوكان جاست صغيرمثلا:

1. ديريلهم خمارات كل وحدة بلون يعني نوعي في الالوان و زيديلهم صابونة .
2. او ديريلهم قرعة ديودورون مع جال دوش.
3. او ديريلهم ولا قادرة بيجامات تاع الصيف. 
4. او ديريلهم سرابت مع صابونة.
5. او ديريلهم كلاكيت تاع الدار يكونو سامبل و ماشي غاليين .
6. ولا مالقيتيش خلاص واش تمديلهم ديريلهم طلاء الاظافر و لا حاجة من مكياج. 
7. و لي تقدر و عندها دراهم تشريلهم قماش تاع لحرير.
8. او تشريلهم ملابس داخلية .

                          هدايا لاخوة الزوج(لوسك)👦

1. اما اخوة الزوج تقدري ديريلهم قرعة ريحة و قرعة جال دوش و صابونة .
2. او سرابت و صابونة.
3. ولا عندك الدراهم تقدري تشريهم كوفري تاع الريحة يكون احسن.

                        هدايا لخالات الزوج او عماته🙎 

1. اما ما يتعلق بهدايا لخالات او عمات الزوج, ما تكلفيش روحك بزاف, شري زوج باكيات تاع صابون دوف, و كل وحدة مديلها وحدة .
2. او شري قراعي ديودورون متنوعة و رخاص المهم ما نسيتيهمش ولا ما كنتيش قادرة مدي ليكادو غير لاهل زوجك عجوزتك و شيخك و خواتاتو و اخوانو هدا ماكان .

                                هدية لزوجك العزيز💑

بلا ما ننساو هدية لزوجك لعزيز يكون حاجة مليحة و ماتكونيش مشحاحة خخخخخخ قلشيه ماتخافيش هو يولي يصر عليك كثر ما تتوقعي ماشي خسارة عليه كادو يكون مليح و غالي نعطيك مجموعة افكار هدايا وانت خيري لي يخرج عليك و يعجبك مثلا:

1. عطر مميز يكون دوريجين او غالي و ماشي دوريجين
2. ساعة يد 
3. مجموعة ادوات الحلاقة فيليبس
4. ملابس رياضية 
5. حقيبة لاب توب
6. منشفة صغيرة و كبيرة 
7. سجادة و مصحف
8. كووات شابة
9. نضارات شمسية

                و هنا نصل لنهاية موضوعنا 'هدايا العروس لاهل العريس '

و اتمنى لكم حياة زوجية سعيدة, و ربي يرزقكم بالذرية الصالحة, ان شاء الله

💋💋💋💋💋💋💋💋💋💋💋💋💋💋💋💋💋💋💋💋

مواضيع مقترحة 

 ااساسيات فاليزة شهر العسل  : لقراءة المقالة اضغط هنا 👉

قائمة جهاز العروسة من الالف الى الياء :لقراءة المقالة اضغط هنا👉

اساسيات فاليزة ليلة الدخلة   : لقراءة المقالة اضغط هنا.👉

للانضمام لقناتي على اليوتيوب  اضغط هنا   👉